Tagebuch Lucky
 
Magnolia Gardens Good Lucky Boy, geb. 4. Februar 2010
 
 
11. März 2011
Hi manuela
Hüt hätt i dir bim ene haar chönne sälü säge! Mir sy am vomittag i ds nöihuus gfahre, wo mir ds outo parkiert hei... vo dert us sy mir dürs naturschutzgebiet – aus am see u de aare nah – nach interlake west gwanderet. I ha zwar nid dörfe frei umegumpe, aber der max het mi a der länge leine gha, u so han i trotzdäm chlei chönne mache wien i ha wöue. Uf jede fau han i der plousch gha.
Ds iinterlake hei mini zwöi öppis z’mittag gässe un i ha ne ganzi salatschüssle vou wasser übercho. U zwar z’auerrscht, bevor si ihres ässe hei übercho. Das hingäge han i dringend nötig gha!
Nach de eine hei mir ds poschi nach thun gnoh. I bi am max uf der schoss ghocket u ha zuglost, wie die zwöi mit emene grösi quatschet hei. Plötzlech seit d’christine „lue, der sy d’manuela u ds nicy!
I weiss ja nid, was das grosi verschtange het, aber es het gmeint: „ja, d’thermik muss gut sy, es heit viu deltagleiter i der luft.“ Mini zwö i hei sech agluegt u uf de stockzäng gachet.
Im nöihuus sy mir usgstige u wider is outo ghocket. Der max het gmeint, mir chönnte ja nach untersee zrüggfahre u wenn du no vorusse sygisch, chönnte mir dir ja hurti tschou säge u du gsächisch, was bishär u mir worden isch. Wo mir bim „magnolia garden“ verby gfahre sy, isch dis outo haut scho wäg gsy u mir sy du wider heigfahre.
Ganz liebi grüess a di ganzi magnolia-familie vo dym
Good Lucky Boy u sym ahang so, u itze bin i uf der nase.
 
****************************************************************************
 
6. Februar 2011
Hüt sy mir über e Mittag nach murte gfahre u hei dert am see nah e spaziergang gmacht. mini 2 hei sech gwunderet, dass der see bis wyt use gfrooren isch gsy. mi het das weni u nüt interessiert. I ha zwar diversi hundis troffe, mi aber gergeret, wiu mir vierbeiner dert nid ohni leine dörfe umgumpe. Under vilne andere han i sogar 2ne shih tzüggeli – beidi ganz brun u zimmli chliner als i – dörfe tschou säge. Komischerwys hei mir aber nid bsunders fröid gha anenang – kes vo üs 3ne het o nume es bitzeli gwädelet!! Nächhär si mir no wyter nach landeron, u dert hei mir mini spezialfründe – räbers u liebis – troffe. Mönsch, hei die 4ri aube nes gschyss mit mir! Für die bin i der liebscht, der bescht u überhoupt!
Wo mir deheime parkiert hei, isch üs d’ruth – das isch üsi nachbarin – cho rüefe. Mir söue doch über echo, damit ihres nöie hundi un i zäme chönni spile. Das han i mir natürli nid 2x la säge! D’mira u i sy wie di wiude dür ihre garte grennt. Si isch es bitzeli grösser aus i u – dank irne länge bei – o zimmli schnäuer. aber i ha de haut aube d’abchürzig gnoh! D’ruth het das schampar klever gfunge, aber für mini 2 isch das natürli nüt nöis, das machen i o im hundekurs eso. D’mira isch so zwüsche 1 ½ u 2 jahr aut. Me weis das nid so gnau, wiu si us portugal chunnt. Dert isch das arme tier vo irgend so mene „liebe“ mönsch usgsetzt worde. So öppis chöi sich mini lüt überhoupt nid vorsteue. Aber itze het si’s guet u mit mir der bescht kamerad überhoupt. Wahrschynlech chunnt si de o mit mir i glych hundekurs. Fröie mi scho itze druf.
Am abe bin i ganz schön uf der nase gsy. Ha nid emau me der marc, wo isch ds bsuech cho, möge tyrannisiere. Bi nume under der coach gläge, ha troumet u gschnarchlet. I findes irrsinnig toll, dass i itze grad näbedra e fründin ha, für mit ere z’spile. Z’nächschte mau söue de mini 2 auteli e foto vor mira u mir mache. Die chan i dir de schicke.
 
****************************************************************************
 

9.-11. Juli 2010
Hallo liebi magnolia-gardens-familie

Am frytig sy mir wider ufs Schiff. Wius so grusam heiss isch gsy, si mir haut a waudrand i schatte ga hocke. Uf e see hei mir nid chönne, wiu d’christine het zum coifför müesse. Mir sy no bi mine spezielle fründe – em pierre u der beatrice – zum ene glesli yglade gsy, aber gange sxy mir ersch, nachdeäm es e chly chüeler isch worde.
So um di 10ne hei mer no e spaziergang gmach. Zersch bin i em LEGO begägnet, das isch e 2jährige shih tzu. U wi das unger shih tzüggelis äbe so isch, hei mir üs – trotz de verschidene sprache –
uf ahieb guet verstande. I hoffe, das i der LEGO no mängisch triffe, hoffentlich aber bi weniger heissem wätter. Dir gloubet nid, uf em wytere spaziergang han i öppe no 10 anderi nätti u liebi hüng troffe. Am morge am viertu ab 4i han i mini lüt gweckt, u si sy mit mir cho ne spaziergang mache. Denn isch es no veie chli chüel gsy.
Am Mittag sy mir i neueburgersee ufe gschipperet. Während em fahre het geng es chüels lüftli gwäit, so das es ganz agnähm isch gsy. I der „schweinebucht“ hei mir liebis u zimmermas troffe. Die sy alli zu üs uf d’fly cho. Mi hei si geng e chli düschelet u nes nasses tüechli zum druf lige han i natürlech o gha. Wo du us em burgunderloch d’wulke immer scheuer u schwerzer sic ho, hei mir üs du uf e heiwäg gmacht. Chum sy mir i üsem hafe gsy, het’s afa rägne. Mir si aber trotzdäm ga spaziere. Plötzlech isch e jack russel-hündin ch z’düse für mir tschou z’säge. Der max het mi losglah u mir zwöi sy über e rase düüset wie die wiude. Nach emene wyli hei mini auteli mi zrügg grüeft – das heisst:
si heis wöue, aber i ha überhoupt nüt ghört. Ersch wo du di andere irem „virgule“ grüeft hei, het’s du bi mir o ändlech ghoue. Wiu d’wätterprognose absolut schlächt si gsy, hei mir du zämepackt un üs uf e heiwäg gmacht.
Bim letschte gartebisi han i der max no zünftig i d’sätz bracht. I bin im wie ne düse ab, un är het angscht gha, i göng grad düre thuja uf d’strass. Mönsch, isch dä suur gsy! Wiu i ds glyche am morge grad wider probiert ha, hei si mi du haut a d’leine gno. Die beide hei überhoupt nid chönne begryfe, das i plötzlech nümme ha wöue fouge! (später hei si du usegfunge, werum!)
Am sunnti hei mir e usflug nach interlake gmacht. Mir sy müglechscht am schatte na, am brunne hei mir rascht gmacht, un i ha chönne wasser läpple. Dert han i bekanntschaft vo zwene tibet terrier gmacht. Ds einte het fasch usgseh wien i, nume grösser u scho 2jährig. Das isch es liebs gsy, un i hät gärn mit im spilt. Aber der euter rüd, wo o isch derby gsy, het mi agruret. Das het mi nid nätt dünkt.
Der räschte vom tag hei mir zäme deheime uf der schattige terrasse verbracht, mit usflüg i garte – mit leine! – zum bisle u wässerle.
Später am abe, wo mir dinne ghocket sy, het d’christine plötzlech gseit: „Lue, dert isch e junge fuchs!“ U würklech, under em gartetisch het es füchsli zu üs is wohnzimmer ine gluegt! Itz hei mini zwöi auteli ändlech tschegget, werum i im garte so ufgregt bi, u unmüglech cha fouge!! Öppe e stung später isch das füchsli no einisch uf d’terrasse cho inluege. I hoffe, dä houis de öppe wider, süsch lö die mi – us lutter angscht um mi – no es wyli nid ab der leine!!!
Ganz liebi grüess us em tropische gümligen
Lucky + Co.

 
****************************************************************************
 
7. Juli
Mensch bi ig clever...

I ha dir zwar ersch grad geschter gschribe, aber das mues i dir unbedingt verzelle!
Geschter am abe hei mir uf der terrasse grillet. Damit i nid eifach säubständig i garte hingere cha, hei si terrasse mit grüenem drahtgitter abgsperrt. Du gloubsch nid, aber i ha’s fertig bracht, das uf z’tue! Nachhär bin i uf d’stäge gstange u ha se herusfordernd agluegt. Die zwöi hei im erschte momänt ds muul offe vergässe. D’christine het gseit: “das darf doch nid wahr sy!“ u het afa lache. Der marc – das isch ihre suhn, u, wes nötig isch, mi hundesitter – het o glachet u zue’ne gseit:
"dir bruchet öich gar nid z’wundere. D i r heit ihm das bybracht, u zwar mit em dog domino"“
I bi du hingere düüset, bevor si mi hei chönne zrüggha, u - vor lutter stouz uf mi säuber - wie nes wiuds wäschpi düre garte graaset bis mi der max isch cho zrügg hole! Gäu, manuela, i bin es super-clevers "kerlchen"“?!
Wünsche aune e wunderschöne tag
Di lucky
 
****************************************************************************
 
6. Juli
Hi Manuela
Mir si fasch jede tag uf dire homepage, damit mir di nöischte biudli vom starlet u de chlyne boston nid verpasse! Di sy aui super süess – ds starlet aber für üs shih tzu-fans natürlech ganz bsunders.
I bi geschter wider im wäupekurs gsy. I üsere kategorie sy itz nume no der JJ, ds chili, d’rihanna
(i gloube si heisst so, sicher bin i aber nid!) u natürlech i. üsi lehrere, d’silvia, isch ganz e gäbigi.
Si fingt, mir sige vier tolli hüng u machi üsi sach guet. U da mir nume no vier sy, lehre mir natürlech de o meh.
Mir hei aber super fröid gha, wo mir gseh hei, dass - eis nach em andere – no 2 wyteri shih tzüggeli sy cho. Auerdings sy die ir gruppe vo de chlinere. Eis het d'farb ganz ähnlech wie mis mami dasha u ds – no es bitzeli chlinere - glychet mim schwöschterli, em golden beauty! Die sy beidi nid so fräch wien i! I ha du aber lieber mit der lu – emene tibet terrier – gschpiut, die kennen i haut o scho länger. Mit em JJ verstah ni mi ungerdesse gar nid so schlächt. Mir chöi afe ganz aständig zäme spile.
Ganz liebi grüess us em tropische gümlige
Dy good lucky boy
 
****************************************************************************
 

21. Juni
Z'Nöischt vom Lucky

Hüt bin i wider im wäupekurs gsy. Das het richtig gfägt. Mir hei viu nöis glehrt u hei sogar chönne spile. I bi richtig e tolle hung gsy u ha guet gfolget. Bim abrüefe bin i jedesmau sofort zur christine grennt u ha mi vor luter fröid uf em bode gwäuzt, so dass si mi fasch nid het chönne abinde. Si isch richtig stouz gsy uf mi. O d’brigitte het mi globt.
Mir hein üs übrigens agmäudet für e folgekurs u fröie nüs scho druf. I hoffe, es wärdi für mi de nid z’heiss, aber d’brigitte het gseit, si tüege de es bassin mit wasser häresteue. Dert dörfi me sich de ga abchüele. We de das nid sött nütze, geit d’christine de haut mit mir hei, da si ja genau weiss, das mir shih tzus d’hitz gar nid so gärn hei.
Im übrige han i mine lüt letschti wuche müesse zeige, das i de kes baby me bi. D’christine het vorsichtshauber im büro u vor mim schlafchörbli im 1. stock (i ha drum mereri chörbli!) no windle häregleit. Die müesse doch ändlech merke, dass i ja scho bau 5 Monet aut wirde, drum han i die dinger gründlech verrupft. So, das het si itz dervo.

22. Juni 2010
Hüt han i wäge der tollwuet-impfig i d’klinik loupeneck müesse. Mönsch, het mir das gstunke! Si hei mi müesse ine trage, i wär um nüt i der wäut vo säuber d’stäge ufe glüffe! D’frou dokter het mi gründlech ungersuecht, gwoge – i bi auso 5,1 kg, o nümme grad der liechtischt - sogar fieber het si gmässe. U de het si mer haut no müesse e gyggs mache. I bi aber e grosse gsy u hat ke muggs gmacht. Ds goodeli han i de aber nid wöue vo’re. I has ersch gno, wo mers der max gä het. Eis, won i nume hurti abgschläcket ha, het er du mit use gno. Dert han is de doch no gfrässe. Bin i froh gsy, das i wider ha chönne heifahre.
Im büro han i mi du grächt u hurti wider mis wassergschirli usgläärt! Nach em büro hei mer no e spaziergang gmacht u nachhär bin i wider wie nes wiudsöili dür üse garte graaset. Der max het du mit mir so öppis wie agility gmacht, i der hoffnig, i wärdi vilicht doch de chli müed. Derfür han i du gruusam hunger gha, ha z’nacht gässe u bi c h l y ga pfüsele.
Liebi grüessli a alli vom magnolia garden
Lucky

 
****************************************************************************
 

16. Juni - Hallo Manuela
Juhuu, i han es nöis hobby!
I bringe d’christine nöierdings jede tag fasch zur verzwyflig. Da mir hundi ja jederzit müesse chönne wasser trinke, han i säubverständlech o im büro mis wassergschirli.
Vor es paar tag han i aber usegfunge, wie me das cha uslääre un e rise morerei mache. Hüt het sy du es angers gschirli mitgno, i der hoffnig, si müessi de nid jede tag es paar mau der bode tröchne. Aber weisch was, da het si sich de gruusig verrächnet. Trotzdäm dass das gschir unde ume no gummi het u ono viu schwärer isch, han is vori grad wider mit em gröschte vergnüege usgläärt!!
Si het du öppis vor sech häre brummlet, wo si scho wider het müesse putze.
Ganz liebi grüess a aui mitglieder vo der magnolia-garden-familie
Öie good lucky boy u ahang

 
****************************************************************************
 
8. Juni - Sälü Manuela
Je viens directement de Landeron

Du gsehsch, i lehre sogar scho chly französisch!
Am frytig mittag sy mir nach landeron gfahre. Mir verbringe eigentlech fasch der ganz summer d’ wuchenänd uf em see. Vor beatrice sy mir zu men e apero yglade worde. D’christine un i sy zäme glüffe u der max het ds byboot gno. Da d’beatrice u der pierre mi syt ere wuche nümme gseh hei, isch das – wie immer - e riiiise begrüessig worde. Zu üsem schiff zrügg han i du o mit em gümmeler dörfe fahre. Bi schuderhaft stoutz gsy uf mi, wiu i überhout e ke angscht ha gha.
Am samschtig morge sy mir zäme über d’fäuder ga spaziere – natürli nume uf de wägli – dert han i
so richtig chönne umedüse u öppe mau la abrüefe. Aber meischtens sy d’grüch rundume interessanter gsy, aus mini zwöi auteli!
Am namitag hei liebis üs yglade, mit ihne die erschti fahrt mit em nöie schiff z’mache. Mini zwöi hei nid dra dänkt, dass dert ja no gar ke sunneschutz vorhande isch, u hei sich jämmerlech verbrönnt. (Si hei usgseh wie 2 schlussliecht. I ha mi fasch chli gschämt für se!) Einzig i ha natürlech geng
es schön chüels fäli gha u ha nid emau müesse hächle. D’christine het mir nämlech es frotté-tüechli flotschnass gmacht, u derfür gsorget, das i immer schön under em tisch am schatte gläge bi.
U wasser het si für mi natürlech o derby gha. Ungerwägs han i no d’petersinsle dörfe ga erforsche, mir hei nämlech dert – äxtra für mi – e zwüschehaut ygleit. Im übrige han i mi beno wie ne aute seebär! Es hei aui nume so gstuunet.
Am abe sy mir du mit em peter u der yvonne ga z’nacht ässe. Im schattige gärtli isch es für üs aui sehr agnähm gsy.
Am sunntig morge han i mit emene 13jährige tibet terrier - em mike - ganz toll chönne spile. D’bsitzer hei em max verzeut, dä sygi, bevor si ne zu sich gno heige, e misshandlete arme hundi gsy. Mir zwe heis aber tiptop chönne zäme. Wo du d’christine o no cho isch, isch der mike sofort zuere gsprunge
u a ihre ufegumpet. Sine beide lütli si fasch d’ouge zum chopf us gheit. Das heig der mike de no nie gmacht, a mene frömde eifach ga tschou säge. Leider hei du aui 3 wyter müesse, un i ha ke spiu-
kamerad me gha.
Wiu ds wätter nid e so toll isch gsy, sy mir du am mittag hei gfahre. Im garte han i mit mim agility-schluuch no so richtig wiud im züg ume turnet. Wos plötzlech donneret het, bin i zersch schuderhaft erchlüpft, ha mi aber de schnäu wider beruhiget u bi mit mine lüt ine gange.
Am Abe hei mir du uf em computer di süesse babies vor der lisa bewunderet. Mir aui finde di 4ri mega-süess u gratuliere ganz härzlech.
Liebi grüess Good lucky boy + co.
 
****************************************************************************
 
6. Juni - Hallo Manuela
Wäupe-Erziehigskurs!

hüt bin i z'erschte mal im wäupe"erziehigskurs" gsy. dert hets ussert em JJ (weisch, das isch der staff) ke einzige hung gha, won i kennt hätt. vor lutter fröid a aune dene nöie fründe han i totau düredräit u im afang überhoupt nid uf d'befähle vor christine glost. aber die het nume gmeint, i syg doch no es baby, das chömi de scho no. zum spile hei d'kursleitere üs i zwe gruppe ufteilt. i grossi u chlyni. i bi natürlech zu de chlyne cho - derby bin i nämlech scho zimli gross! dert han i natürlech wider es kämpfli mit em JJ gha. dä het aber itze nüme angst vor mir - leider - eini vo de leitere het mer du ghuufe. später hei mir aber guet zäme chönne spile.
nachhär han i du aune zeigt, dass i sehr guet cha lose. bim abrüefe bin i im gstreckte galopp zur christine grennt. a der lockere leine düre spalier vo de andere hüng loufe han i äbeso guet gmacht wie im zickzack um d'hüetli ume. sogar "sitz", "warte" u "platz" han i tiptop gmacht. (deheime machen i sogar "gim'me five" - da isch aube der max ganz bsunders stoutz uf mi! das cha nämlech no lang nid jede.) bi du glych froh gsy, won i wider bi i ds outo bracht worde, won i mi vo dene strapatze ha chönne erhole! der max het scho im garte uf mi gwartet. är het no mit mir gschuttet. itz bin i aber uf der nase u ga de nach m ässe ga schlafe.
tschüüss
lucky
 
****************************************************************************
 
2. Juni - Liebe Manuela
Wie geht’s der Magnolia Garden-Familie?
Am Montag war ich mit Lucky in der ersten Welpen"erziehungs"-Stunde in Uetendorf. Ich soll dich ganz herzlich grüssen, und zwar von der Dame, die statt eines Super-Shih Tzus ein Löwchen gekauft hat. (Ihren Namen weiss ich leider nicht mehr. Alterserscheinung!) Im Übrigen hast du einen Ruf wie Donnerhall! Alle, die dich kennen, schwärmen davon, was du alles mit deinen Lieblingen unternimmst. Gratuliere übrigens noch zu den tollen Agility-Erfolgen von Lupo und Nicy in Münsingen.
Lucky macht unser Leben zu einem Abenteuer – wir wissen nie, welche "Untaten" der kleine Strolch geplant hat! Wir lieben ihn sehr und können uns ein Leben ohne den süssen - gar nicht mehr so kleinen Kerl – überhaupt nicht mehr vorstellen.
Ganz liebe Grüsse an die ganze Magnolia-Familie und Lisa wünsche ich alles Gute zur bevorstehenden Geburt und freue mich schon auf die ersten Fotos auf der Homepage.
Christine & Lucky
 
****************************************************************************
 
26. Mai - Hallo Manuela
Lucky-NEWS
Im Moment liege ich faul im Büro. Kurz vorher habe ich meine beiden Menschen mit allerlei Faxen zum Narren gehalten. Trotzdem sind die Beiden der Meinung, ich sei der tollste Hund überhaupt!
Sie "bluffen" überall damit, was ich schon alles könne, trotz meiner erst bald 4 Monaten. Sie nehmen mich auch überallhin mit. Heute Abend z.B. darf ich an den 60sten meiner Freundin Beatrice, die freut sich riesig. Ich werde mir Mühe geben und die Gesellschaft etwas aufmischen.
Ich weiss, du wartest immer noch auf Fotos und Film, aber Max war die letzten 2 Wochen krank (Grippe), aber ich werde ihn immer wieder daran erinnern.
Immer wieder informiere ich mich im Internet über meine Magnolia Gardens-Familie und freue mich über jede neue Nachricht und die Fotos.
Morgen muss ich leider zu Dr. Riitano, die nächste Impfung ist fällig. Normalerweise bin ich ja ziemlich frech und vorlaut, aber dies wird auf jeden Fall ein Grund zum Jammern!
Da ich ja jetzt schon "gross" bin, gehe ich ab Montag mit Christine in den Welpenkurs – nicht mehr nur in die Spielgruppe.
Wenn du willst, kann ich dir ja schreiben, wie’s dort so ist und wie’s mir gefällt.
Ganz liebe Grüsse an die ganze Magnolia-Familie und Lisa wünsche ich alles Gute für die baldige Geburt. Dein Good "Lucky" Boy & Co.
 
****************************************************************************
 
11. Mai - Liebi Manuela
Danke für d'grüessli us Elba
I danke dir ganz härzlech für dini grüess us elba. Ha uf dire internetsite d’feriebiudli agluegt u gseh, dass mis mami, der pluto us nicy iri erholig richtig gnosse hei. I bi fasch - aber würklech nume fasch - es chli nidisch gsi!
Auso, i bi itz geschter i der tierklinik ds bsuech gsy. Es si no vier anderi hünd cho. Aui öppe glych alt. E beardes collie, es wysse staff – u steu der vor, dä het ussert schwarze fläcke um d’ouge no es schwarzes härzli uf der fudibacke gha – e beagle u nes schwarzes pudeli, aber das isch scho 6 monet aut u zimli längwilig gsy. Es isch de würklech ke fule gsy. Mir hei ke sprütze übercho. Mir hei dörfe spile – i nume mit däm längwilige pudu, wäge der grössi u em gwicht vo de andere – d’zwöibeiner hei e vortrag glost – di hei zwar später zu enang gseit, das für si nid so viu nöis ghört heige - u nes spielzüg hets de ono gäh.
Nachhär sy mer no nach landeron gfahre, wiu üsi fründe mit irem nöie schiff sy i hafe cho. Mir hei ne wöue häufe u se mit em outo zrügg fahre. Wiu mer no chly zfrüe sy dert gsy, han i no ohni leine – das isch zwar eigentlech im hafe verbote, aber ussert üs isch ja niemer ume gsy – dörfe win es wiudsöili über e rase düse. Mönsch, het das gfägt!! Derfür bin i hüt haut e chly uf der nase. Es isch äbe du o no spät worde.
Für hüt spilen i itz haut e chly ds ängeli u bereite mi derfür uf di morndrigi wäupespilstung vor. D e louft de wider e fure!
Übrigens si mini lüt wahnsinnig stouz uf mi: afe mau hani - emu meischtens - e guete appäu, cha scho "sitz" u "platz" u cha aleini hinger im outo - mit speziausicherheitsgurt – blibe, u zwar o n i z’jammere. Im übrige han is o fertig bracht, d’absperrig vor stäge z’überwinde. Si hei se hüt wäg gno, so chan i itze es paar tritte ufe u de dert höckle u rüefe, damit mi de öpper wider chunnt cho ab lüpfe. Du gsehsch, i wirde langsam gross!
Liebi grüess a di ganzi Magnolia-Familie
Di Lucky & co.
 
****************************************************************************
 
2. Mai - Hallo nach Unterseen
Wie geits öich allne z'untersee?
Ha mi z’gümlige guet ygläbt, u aui hei mi so richtig gärn. I haute mini zwöi auteli ganz schön uf trab! I mache so zimmli aues, wo gott – wär o immer das söu sy – verbotte het. Im büro han i 2 hobbies: zum fänschter useluege u dezue der rahme aknabbere, viu luschtiger aber isch, wenn i d’silent gliss hinderezieh u de lah la zrüggschletze: d a s chlepft de öppe schön!! We si mir de wüescht säge, hei die zwöi de würklech no z’gfüehl, i merki nid, dass si uf de stockzähn müesse lache. Drum gan i de aube hurti chli mit ne ga schmüüsele. Schynheilig u clever, gäu? Der max isch übrigens der meinig,
i heig für mis auter scho e perfekte Appell. (Sogar wes de einisch grad kes goodeli git.)
Aui, won i lehre kenne finde, i sigi de scho schampar e schnüsu! O im hafe z’landeron sy aui vo mir begeischteret. Du chasch dir nid vorschteue, wi das aube e uflouf git, wäge mir! I bi scho 2x uf em schiff gsy, aber usfahre chöi mer no nid, es het nämlech es änteli uf der fly bridge, wo sini eier usbrüetet. Es säge zwar aui im hafe, mir söue doch das näscht eifach über bord wärfe, aber das bringe mini zwöi natürlech nid fertig!
I ha dir no ganz härzlechi grüess vom walter u der barbara. D’barbara isch absolut begeischteret vo mir. Kes wunder, ihre han i der schmuus bracht, u der 12jährig hung - wo o ds bsuech isch gsy - so gnärvt, das er sich freiwillig zrüggzoge het!
Am nächschte mäntig abe bin ig i üsere tierklinik yglade. I dörf de i der ganze praxis umgumpe, d’tierärzt heige ke uniform a, i überchömi ke schprütze u am schluss dörfi i de no es gschänkli mit hei näh. I hoffe nume, das sygi de ke fule!
Merci de no, das du mir ds fuetter hesch la schicke. D’christine het em max zwar gseit, är söu dir danke, aber i weis nid, ob ers gmacht het. U irgendeinisch überchunsch de o no aui biudli, won er gmacht het.
Ganz liebi grüess a alli zäme vom "magnolia garden" vo öiem Good Lucky Boy & sym ahang
PS. Wie geits mini 4 schwöschterli? Hoffentlech hei die sich o so guet ygläbt. I löi se de o ganz härzlech la grüesse.
 
****************************************************************************
 

 

 

 

 

 
 
 
 
 
 
 
 
 
 

All content within this website is copyright© Manuela Fuchser Gurtner